Nababahala na rin ang Senado sa tumataas na bilang ng mga inaaping kasambahay sa bansa, particular na ang pinakahuling report na mahigit limang taong pagmaltrato umano ng isang maimpluwensiyang negosyante sa 18-anyos na dalaga.
Ayon kay Senate President Juan Ponce Enrile, dapat tuluyan nang magkaroon ng batas na magiging sandigan ng mga pobreng kasambahay sa bansa.
Dapat din umanong malaman kung bakit may mga among nakukuhang manakit ng kanilang kasambahay na marapat lamang itinuring na bahagi ng bawat pamilya sa isang tahanan.
Mismong si Senate Pro-Tempore Jinggoy Estrada ang nanawagan sa pamunuan ng Philippine National Police na tutukang mabuti ang kasong isasampa laban sa pamilya ng negosyanteng si Mariano Tanenglian base na rin sa sumbong ng kasambahay na si Mary Jane Sollano.
“Dapat mag-imbestigang mabuti ang PNP dahil helpless ang ating mga kasambahay. Wala silang inaasahan kundi ang ating mga awtoridad,” anang batang senador.
Muli, nanawagan si Estrada sa Kongreso na madaliin ang pag-aapruba ng Kasambahay Bill upang magkaroon na ng sandigan ang mga kasambahay sa bansa.
Si Sollano ay nailigtas ng pinagsanib na puwersa ng Commission on Human Rights, Department of Social Welfare and Development at PNP mula sa tahanan ng amo nito sa Quezon City.
Partikular na umano’y ipaghaharap ng sakdal ang asawa ng negosyanteng si Aleta at dalawang anak nito na umano’y trumato sa kanya na masahol pa sa hayop nang manilbihan siya bilang kasambahay ng mga Tanenglian.
Nabatid na nagging kasambahay ng mga Tanenglian si Sollano noong 13-anyos pa lamang siya, ayon sa abogado nitong si Atty. Anna Marie Trinidad. Si Tangelian ay nakababatang kapatid ng business tycoon na si Lucio Tan.
Source:
Police Files
Agosto 14, 2009
Page 2
0 comments:
Post a Comment